विज वितरण कंपनीच्या बेजबाबदार अधिकाऱ्यांमुळे शेतकऱ्याचा मृत्यू" तामगावं पोलीस ठाण्यात तक्रार दाखल!

 

 शेख कदीर भाई  

संग्रामपूर, :वानखेड येथील अल्पभूधारक शेतकरी राजेंद्र मरसिंगराव देशमुख (वय ६०) यांचा घरासमोर अवघ्या एक फूट अंतरावर असलेल्या धोकादायक व असुरक्षित विद्युत पोलमुळे विजेच्या धक्क्याने दुर्दैवी मृत्यू झाला. ही घटना २६ जुलै रोजी घडली असून, याबाबत तमगाव पोलीस ठाण्यात तक्रार दाखल करण्यात आली आहे.पोलवर असलेल्या विज प्रवाहीत तारांचे व्यवस्थापन अतिशय बेपर्वा व निष्काळजी पद्धतीने करण्यात आले होते.

 अनेक विज जोडण्या अस्ताव्यस्तपणे लावण्यात आल्या होत्या. संबंधित विद्युत पोल हा तळाच्या भागातून गंजून तुटण्याच्या स्थितीत असूनही महाराष्ट्र राज्य विज वितरण कंपनीच्या संबंधित अधिकाऱ्यांनी नागरिकांच्या तक्रारी असूनही कोणतीही कार्यवाही केली नाही.

घराच्या परिसरात माकड हाकलताना राजेंद्र देशमुख यांच्या हातातील काठीचा संपर्क विज प्रवाहीत तारेस झाला व यात त्यांचा जागीच मृत्यू झाला. 

या घटनेमुळे देशमुख कुटुंब उघड्यावर आले असून त्यांच्या पाठीमागे वृद्ध आई-वडील, पत्नी आणि दोन मुली आहेत.

स्थानिक नागरिक व ग्राहकांनी यापूर्वीही संग्रामपूर व खामगाव विभागाचे कार्यकारी अभियंता, सहाय्यक अभियंता, तसेच स्थानिक लाईनमन यांच्याकडे तक्रारी करून पोल स्थलांतर आणि वायरिंग दुरुस्तीसाठी विनंती केली होती. 

मात्र, विज वितरण कंपनीच्या अधिकाऱ्यांनी याकडे अक्षम्य दुर्लक्ष केल्याने ही दुर्घटना घडल्याचा आरोप करण्यात येत आहे.

याबाबत मृताच्या नातेवाइकांनी संबंधित अधिकाऱ्यांविरोधात सदोष मनुष्यवधाचा गुन्हा दाखल करण्याची मागणी केली असून, शासन स्तरावरून देशमुख कुटुंबाला आर्थिक मदत व नुकसानभरपाई द्यावी अशी जोरदार मागणी होत आहे.