उद्धारली कोटी कुळे, भीमा तुझ्या जन्मामुळे… भीम जयंती उत्साहात साजरी

केनवडजवळील पिंपरी सरहद्द येथे महामानव डॉ. बाबासाहेब आंबेडकर यांच्या १३५ व्या जयंतीनिमित्त गावात उत्साहाचे आणि आनंदाचे वातावरण पाहायला मिळाले. सामाजिक एकता, बंधुता आणि समतेचा संदेश देणाऱ्या या जयंती सोहळ्याने संपूर्ण गाव एकत्र आल्याचे चित्र निर्माण झाले.जयंतीनिमित्त सकाळपासूनच विविध कार्यक्रमांचे आयोजन करण्यात आले होते. सर्वप्रथम डॉ. आंबेडकर यांच्या प्रतिमेला पुष्पहार अर्पण करून अभिवादन करण्यात आले. त्यानंतर भव्य मिरवणुकीला प्रारंभ झाला. गावातील प्रमुख रस्त्यांवरून ही मिरवणूक काढण्यात आली असून, डीजेच्या तालावर आणि “जय भीम”च्या घोषणांनी तसेच युवकांच्या उत्स्फूर्त नृत्याने वातावरण दणाणून गेले होते.या मिरवणुकीचे वैशिष्ट्य म्हणजे सामाजिक सलोख्याचे दर्शन. मिरवणूक ज्या-ज्या वस्तीतून गेली, त्या त्या ठिकाणी त्या समाजाच्या संस्कृतीचा आदर राखत गाणी वाजवण्यात आली. त्यामुळे सर्व समाजघटकांमध्ये आपुलकी, सन्मान आणि एकोप्याची भावना अधिक दृढ झाल्याचे दिसून आले. गावकऱ्यांनीही या उपक्रमाचे मनापासून कौतुक केले.मिरवणुकीत लहान मुलांपासून ते ज्येष्ठ नागरिकांपर्यंत सर्वांनी मोठ्या उत्साहाने सहभाग घेतला. चिमुकल्यांच्या हातात निळे झेंडे, महिलांचा उत्साही सहभाग आणि तरुणांची जोशपूर्ण उपस्थिती यामुळे मिरवणूक अधिकच रंगतदार झाली. अनेकांनी पारंपरिक वेशभूषेत सहभागी होत या सोहळ्याची शोभा वाढवली.या जयंती सोहळ्यातून डॉ. आंबेडकर यांच्या विचारांचा प्रसार करण्याचा प्रयत्न करण्यात आला. शिक्षण, समता आणि सामाजिक न्याय या त्यांच्या संदेशाची आठवण करून देत समाजात जागरूकता निर्माण करण्यात आली. गावातील विविध सामाजिक कार्यकर्ते, युवक मंडळे आणि नागरिकांनी एकत्र येत हा कार्यक्रम यशस्वी केला.एकंदरीत, पिंपरी सरहद्द येथे साजरी झालेली भीम जयंती ही केवळ उत्सवापुरती मर्यादित न राहता, सामाजिक ऐक्य आणि बंधुतेचा संदेश देणारी ठरली. विविध समाजघटकांनी एकत्र येत दाखवलेला एकोपा हा इतर गावांसाठीही प्रेरणादायी ठरत आहे. यावेळी कायदा व सुव्यवस्था अबाधित राहावी यासाठी शिरपूर पोलिसांचा बंदोबस्त देखील तैनात करण्यात आला होता.